【now.com財經】噚日揀咗隻恒指熊(50944)出嚟，平均買入價為0.0475元，Keep住借小時圖中軸作為量度線，望就望可以落返去小時圖「長方形」底頂線約16,450點就固然最好，但以恒指噚日迷中步走勢，中間拉定16,500點作量度線，到步唔再穿嘅話，隻恒指熊亦都可以功成身退。
持貨至噚日2點半左右，指數重新迫近16,500點附近位置，惜遲遲未穿，還好指數仍於16,500點附近徘徊；終於去到2點55分重新再迫近16,500點多一次，今次終於都穿過啦，但亦都好快又縮返上去，按策略16,500點呢個位守得咁緊，(50944)都係起身算數。
以2點55分見指數穿完16,500點之後即時拗腰，確認線唔過走(50944)，如常的用10分鐘作為走貨時間的話，即於2點55分至3點5分計，(50944)期內高低位做過0.051元/0.05元計，平均走貨價為0.0505元，呢一趟平均執3格或6.52%。以恒指噚日貼地橫行，和到手續費都已經要感恩。
唔知係咪噚晚落雨，定係真係潮濕到好似落完雨，事關今朝起身見到窗出面濕晒，重災區係個廁所，唔知以為個廁所邊度漏水，非常之可怕，比今朝恒指開市跌252點，報16,343點更加之可怕，皆因指數跌似乎大家都覺得係「應該」，問題爭在「幾時」，而今日現下行，就只係「時辰到」。
不過作戰室今朝第一注以好倉出戰，呢兩三日開市前Plan乜都無用，都係開市之後捉住個市點行而出手；嚟到依家10點10分， 指數喺16,37X點呢個位定住，而換上小時圖的話，就見有100線接住，未見上落。
配返牛熊證街貨圖睇的話，以今朝指數開市口價，其實牛證第一層16,400至16,499點嘅牛已經全數被收回，指數暫時高位見過16,450點，而呢口價對熊證嚟講係未造成傷亡嘅，同步喺五分鐘圖上呢口高位變咗粒「射擊之星」出嚟。望多次恒指依家10點16分見16,308點，跌287點，其實開市至今大部份間指數都係靠近牛證街貨層，而16,200至16,299點亦都係牛證重貨區，如果指數確認得到失守小時圖100線的話，借一借保歷加通道口保持拓闊，指數再向下走嘅機會相對較高，咁就機會重新再踩多次入牛證重貨區範圍。
恒指熊(50917)，收回價16,700點，同現價有約320點距離，Day Trade Only，槓桿有約38.09倍，已經係附近範圍熊最高槓桿，確認小時圖低走於100線的話，小注試下。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
