【now.com財經】今朝起身如常的開電視睇新聞，望望最頂個行見天氣報出嚟話有19度，最高有21度；唔係掛，一早出咗門口返緊工嘅戰友實時人感體溫報告話15度都唔知有無，濕凍都真係幾煩。
仲有兩分鐘先至完U，但比香港快一小時嘅日本一早開咗市，上個星期五(3月1日)日經N225指數首次觸及40,000點大關，今朝開市再踩上啲，喺香港時間9點20分時見日經N225升逾340點，做緊40,254點。
可能見隔離島個市咁樣，原先ADR見恒指都係出負數，不過今朝先開升40點，再次踩上16,600點樓上。但如果係廢嘅，其實點都會係廢嘅，依家9點45分，恒指高開低走見跌45點，報16,543點；見我家肥貓捲埋一舊，行過去同佢come返張被，再返埋位之後見恒指向下再落到 16,500邊皮位，嘿，作戰室淡倉應戰。
但係今日個市都唔容易玩，雖然開市到依家10點13分，都見到指數一路南 下，但喺五分鐘圖上見今日啲燭都真係幾大支，而啲影線都係比較長，反映到其實好淡雙方都爭持得幾激烈，可能只係幾分鐘，指數已經縮返50點以上，對於出動有槓桿成份嘅牛熊/窩輪或其他工具嘅投資者嚟講，手腳慢啲都被佢打中。
知道喺呢個欄更加無可能咁快轉策略，事關稿都未出可能已經完成咗幾趟，望望鐘見10點27分，喺小時圖上其實仍然可以畫得「長方形」出嚟，而指數喺依家10點至11點呢粒燭上，低位見過16,473點，算是踩住底線之後推返上去，不過暫時見小時圖10線有阻力啫。
恒指牛(50290)，收回價16,200點，同現價有約345點距離，槓桿約43.54倍夠做Day Trade，過得到小時圖中軸嘅出比較安全；反過來中軸線唔過的話，恒指熊(50944)，收回價16,918點，同現價有約370點距離，槓桿有約33.77倍，向下反返落去底線囉。
無論邊個方向都好，今日個市真心Chok，小注為上。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
