【Now財經台】信義光能(00968)業績後股價勁大升逾24％，雖然摩根士丹利睇好光伏企業產品價格再跌空間有限，而銷量上升將成為信光增長動力，不過，若行業產能及供應持續增加，係咪唔排除價格都要跌？
耀才證券研究部總監植耀輝表示，太陽能板塊上、中、下游都有過剩問題，價格自然會跌，隨著成本下跌，光伏裝機嘅需求將會增加，雖然光伏玻璃需求隨之而增加，但價格仍好難扭轉跌勢。
Stanley又話，信光將會有6條新生產線投產，意味產能過剩問題唔會改善，就要靠增加需求搶佔多啲市佔率，但光伏裝機嘅單價好難有得升，當毛利率未能大幅增長，就要靠慳，往後嘅業績先有機會出現驚喜。
信光今日一升，成功收復100天線，但Stanley對信光呢浸升勢有保留，始終行業前景唔係太理想，雖然信光業務發展有改善，但唔足以扭轉跌勢。
