【Now財經台】國際油價兩連升後，今日(28日)向下，美國上周原油庫存大增逾800萬桶，今晚美國能源資訊署(EIA)會出庫存數字，油價有望連升兩個月，依家紐約期油受制每桶79美元，倫敦布蘭特期油就喺83美元上落。不過，市傳石油輸出國組織及盟友(OPEC+)或延長減產期撐油市，油價後市會點走？
環球期貨交易所客席講師鍾俊鏘指，油價近期強勢，主要受地緣政治影響，例如歐洲及俄羅斯或會爆發正面衝突等。佢又話，OPEC+減產一直都講緊，但係咪真係可以不斷延長減產期都係一個疑問。睇返油價技術走勢，如果紐油可以突破79美元，整個底部形態就會形成，下方支持位睇74美元水平，一旦跌穿就可能會出現轉弱跡象。
