【Now財經台】創業板公司亦辰集團(08365)獲「自己人」甘仿倫以每股1.4元，認購公司新股，佔擴大後股本16.7%，值得留意係，認購價較上周五(23日)收市價有逾47%溢價，入股後即躍升為大股東。亦辰2019年由盈轉虧後，至依家都冇錢賺，連年蝕錢，點解甘仿倫仲肯以咁高溢價增持？不過，消息對股價冇乜幫助，只係今日早段衝高一浸，好快就掉頭下及倒跌。
《香港股票財技密碼》作者梁杰文指，亦辰業務同本港資本市場息息相關，但公司要做返靚盤數，要賺返錢唔係短時間可以做到，至於博公司轉去主板掛牌亦機會唔大，所以估計甘仿倫今次認購新股，係睇好公司長遠前景。
Mike又話，有投資者增持會令公司供股、「抽水」嘅憂慮細咗，但值唔值得以現價入手，就要睇公司市值，依家公司估值約2000至3000萬元，呢個市值嘅公司股價容易大幅波動，因此，投資者暫時宜保守少少，觀察公司業績可唔可以扭虧為盈，投資者見到業績有改善後先入場都未遲。
