【Now財經台】日股牛氣沖天，日經平均指數終於升穿39000關，另一邊廂，日本嘅併購交易(M&A)非常活躍。據《彭博》數據顯示，今年日本併購交易涉及金額大增43%至674億美元，延續去年第4季嘅強勁升幅，並佔整個亞洲市場逾30%。
馬山資本董事總經理林子傑指，M&A活躍同日股強勢相輔相成，佢分析指，日本息口低過其他市場令日圓借貸成本夠平，加上喺牛市做M&A，企業有條件用股票代替現金作為收購工具，股價就跟住大市一齊升，企業資產對買家嘅吸引力大增。
佢又認為，日本提倡逾10年嘅企業改革漸見成效，亦有助提振當地股市。依家日股唔少上市公司變得更投資者友好(investor-friendly)，並樂於進行更多提升公企業價值，繼而提高股東權益嘅公司行動，包括股份回購、增加派息、提升管理透明度、併購交易等。
