【Now財經台】美團(03690)股價昨日(21日)急升，5日合計，係第2大資金流入嘅個股，股價今日(22日)反覆靠穩，多唔多好友食糊離場？產品方面，年中到期，行使價介乎80元至90元嘅CALL輪，槓桿約4倍至5倍，至於收回價約70元嘅牛證，槓桿接近7倍，邊種產品較值博？
滙豐亞太區財富管理香港上市產品銷售經理盧貴良指，由於美團銷售數據理想，帶動股價向上，2月以來累升約25%，但股價升至80元水平就有阻力，所以部分好倉投資者食糊離場。佢又話，見到有投資者用熊證做淡倉部署，PUT輪就相對較少，收回價81元嘅熊證，槓桿約12倍。
