【Now財經台】滙豐控股(00005)今日中午(21日)出咗業績後，股價午後急挫，似乎市場唔係太收貨，值得留意係，淨息差(NIM)喺去年第4季落到1.52厘，今年情況會係點？滙控放榜前市場炒作增加派息，最終第4次股息少過預期，如果想買滙控收息，應該點部署？
南華金融集團副總裁莫灝楠認為，美國始終未開始減息，市場預期聯儲局今年減息4至5次係超級樂觀，最近甚至有傳會再加息，因為今年可能減唔到息，之前美國10年期債息回落，但最近又升返，加上美元反彈，息差就會拉濶，滙控嘅NIM有可能會拉高，或封底唔再大跌嘅機會都好大。
佢又指，滙控呢份業績中規中矩，派息及回購都欠驚喜，所以市場情緒唔會太高漲。部署方面，莫灝楠話，滙控走勢唔會太差，最多跌到58元水平，不過，市場就覺得值博率唔夠，估計今日高位63元會有阻力，但相信57.5元至63元呢個區間唔會咁快失守。
