【Now財經台】截至早上11時止，1小時內《彭博》用戶關注度上升最多港股，依次為華南城(01668)、李寧(02331)、銀河娛樂(00027)、萬科企業(02202)及中國石油化工(00386)。
華南城股價今日(19日)異動，一度飆50%，成交股數較過去100日同時段平均激增38倍，中午收市前升幅不斷收窄，但仍維持雙位數升幅。有國資背景，騰訊控股(00700)有份投資嘅華南城，上周有美元債違約，拖累公司美元債錄得歷來單日最大跌幅，暫時仍未見集團就違約事件發布新消息，或提及事態發展，今日股價突然飆升係咩原因？
富昌證券聯席董事譚朗蔚指，暫時未知股價異動嘅確實原因，華南城有國資背景，市場可能憧憬係咪會獲得資金援助等，但呢個只係賭博性因素。
佢又話，對內房嚟講，關鍵始終係賣唔賣到樓，因此，投資者唔使太在意股價異動原因，因為華南城股價走勢差，雖然今日一度抽升逾50%，但之後升幅「腰斬」，唔排除今日午後有機會變返正流出，投資者要小心。
