【Now財經台】開拓藥業(09939)股價今日(2日)逆市狂飆逾51%，仲收復埋50天線，集團今日出通告，指治療男性脫髮嘅藥物KX-286第3期臨床試驗結果獲得內地國家藥監局批准，去年底曾因同1隻藥嘅臨床試驗數據未有統計顯著性而急插逾30%，依家藥監局批准臨床試驗結果，市場會唔會都睇好開拓藥業？
註冊財務策劃師協會會長黃敏碩指，開拓藥業股價之前跌得太多，即使今日爆升，但仲未完全收復之前嘅失地。佢又話，市場關心醫藥股嘅項目集中喺境內定境外，因為政策對境內研發項目影響較小，相信未必再成為股價不利消息。
黃敏碩又話，後市要留意市場需求足唔足以量產新藥，從而帶動股份嘅毛利率，目前嚟講因為醫藥股太殘，資金會借消息炒上去，佢認為短炒無妨，但暫時唔建議作長線投資。
