【Now財經台】中美「芯戰」令半導體股遭殃，不過，睇返港股嘅半導體股，其中，ASMPT(00522)已連續兩日以大陽燭抽升，衝上逾兩年高位。野村嘅報告指，ASMPT嘅高頻寬記憶體(HBM)業務今年將會有更多商機。
紅蟻資本投資總監李澤銘指，隨著具備生成式人工智能(Generative AI)功能嘅電腦及手機面世，AI嘅應用層面會更廣泛，全球對半導體嘅需求會由下游延伸至上游。
野村嘅報告亦提及，ASMPT今年上半年有望取得南韓半導體企業公司SK海力士(SK Hynix)嘅熱壓焊接(TCB)定單，Alan表示，半導體成品廠商有可能因應AI熱潮擴大產能，ASMPT作為龍頭設備供應商一定會受惠，不過，由於集團屬行業上游，受惠程度會較為滯後，難跑贏同業，但今年趨勢仍然係向好。
