【Now財經台】哈爾濱電氣(01133)股價今日爆升，一度飆23%，屬二線國企嘅哈電亦可受惠於「中特估」槪念，一線嘅相關概念股已經炒咗幾日，升幅開始縮，二線相關股係咪可以接力追落後？再上有電網國策利好，哈電仲有幾多水位？
博威環球證券金融首席分析師聶振邦指，喺多重利好消息帶動下，哈電股價係可以睇高一線，相信股價仍有上升空間。佢又話，電網屬大型基建項目，加上近期內地經濟表現唔定，市場估計，今年內地經濟增長唔及去年，為咗加強市場信心，相信中央會推動基建項目，而涉資5000億人仔嘅電網項目，好大機會喺3月啟動，相信會喺哈電上半年業績反映，所以股價值得憧憬。
聶Sir又話，睇返哈電股價去年10月高位喺2.75元，同現價相距約10%，保守估計有機會企穩2.7元，之後再上望3.2元水平。
