【Now財經台】截至早上11點止，1小時內《彭博》用戶搜尋量最多港股，依次為中國恒大(03333)、恒大汽車(00708)、百威亞太(01876)、融創中國(01918)及比亞迪股份(01211)。
恒大遭香港高等法院頒布強制清盤令，恒大、恒大汽車、恒大物業(06666)中途停牌，恒大停牌前急瀉逾20%，恒大清盤係咪都唔算令人意外？
富昌證券聯席董事譚朗蔚表示，其實恒大危機已經拖咗好耐，市場早已預期結局係清盤停牌，今日可以話終於有個了結，當然，仍要觀望內地及法院方面會否有進一步行動。
Stevan又指，雖然應該開市前就要停牌，但依家中途停牌都問題唔大，因為趁低吸納及願意冒險嘅人已經唔多，甚至已經冇乜人關注恒大系，所以對投資者影響唔大，佢認為，未來可以留意仲有冇債務被揭出嚟，繼而影響銀行嘅決定，但相信事件已經拖咗咁耐，市場早已消化晒。
