【Now財經台】「資產股」國浩集團(00053)分別喺2012年及2018年提出私有化，但兩次都失敗收場，2018年股市興旺，當時提出嘅私有化作價135元，依家集團4大核心業務包括自營投資、物業發展及投資、酒店及休閒業務及金融服務，國浩截至去年6月底止全年，收入增長近40%，純利更大升近74%，國浩股價依家處於57元水平，有冇誘因再度捲土重來，第3度提出私有化？
英皇資本財富管理方案研究總監陳錦興指，國浩對上一次提私有化失敗已經係2018年，過去幾年，爆發疫情、經濟唔好、股價反覆向下等因素，其實都有利大股東重提私有化。
不過，佢指出，依家股價折讓都幾大，呢類綜合型股份對市場來講吸引力唔算大，大股東亦唔容易進行集資，所以的確有誘因再提出私有化。
