【now.com財經】噚日真係凍到打唔到字亦都唔想打字，手指腳趾都硬晒軚；我家肥貓直頭好似自願被啲厚被活埋咁款，突如期來嘅凍真係唔係人咁品；就正如噚日突如期來嘅抽升一樣，呢個元氣彈將所有圖表派同基本分析派嘅人全數打死，無事嘅，大家都會爬返起身嘅。
噚日揀咗隻恒指牛(67116)出嚟，平均買入價為0.0575元，如常的的返Slow STC(14.3)做下Swing Trade。去到下半場1點10分至1點35分，Slow STC(14.3)上到超買位，呢啲時間當Swing trade完一趟都真係可以架。
以呢段期間(67116)高低位做過0.07元/0.064元計，平均走貨價為0.067元。呢一趟平均有9.5格或16.52%落袋，追唔到消息棍嘅話，但都執到呢個數，很不錯啦？
今朝恒指再升多248點開市，開報15,602點，先將第一層熊證街貨15,500至15,599點全數收回，不過呢層貨量又唔係好多，當佢今朝食咗個叮叮點心做早餐啦。
指數喺開市後都未見一支箭飆上，同時由於喺小時圖至日線圖都見到有平均線作勢做恒指阻力位，所以今朝作戰室開好倉追上都唔係追得太狼死， 好倉小注追出大家都係爬緊格仔。再嚟到依家9點45分，恒指連15,600至15,699點嘅熊證都吞埋，暫時總共食咗371張期指。
未到10點望咗個日線圖先，今日指數開市後上行都算叫做有爬過上10線之上，企唔企得穩就要四點先知，但今日條10線都比較重要，事關畫咗成年嘅日線圖「大型下降通道」底線早幾日已經失咗，係呀，跌穿咗條「大型下降通道」呀；而噚日同今日指數爬返上去，其實都只係盡力爬返入「大型下降通道」裡面，記得最好係爬返入去，如果唔係，新一條「下降通道」隨隨時又會出現。
終於等到10點，由於喺15分鐘之前見五分鐘圖已經出咗「小圓頂」，作戰室亦由好轉淡，跟住再睇小時圖第二粒燭確認保持低走於50線，恒指熊(67054)，收回價1,648點，同現價有約370點左右距離，槓桿有約34.08倍，同作戰室用同一策略：Lock實小時圖50線，用五分鐘圖嘅平均線+量度線，逐線逐線向下打；萬一連五分鐘嘅10線都打唔過線，咁變陣做 Swing囉，好簡單啫。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
