【Now財經台】截至早上11時止，1小時內《彭博》用戶搜尋量最多港股，依次為龍湖集團(00960)、復星國際(00656)、萬科企業(02202)、建設銀行(00939)及華潤置地(01109)。
據外媒報道，內地考慮動用2萬億元人民幣平準基金推一系列措施救市，雖然只係市場傳聞，但大市已應聲抽高，上日(22日)急插嘅內房收復返部分失地，包括噚日重挫嘅潤地，大摩預期，潤地股價未來30日將會上升，又話股價近日大跌估值已變得吸引，到底今個星期正式宣布推出2萬億人仔救股市嘅機會係咪好大？潤地呢類國企內房值唔值得部署？
富途證券高級策略師譚智樂指，如果消息屬實，對挽回市場信心有一定幫助，喺救市憧憬上，唔建議投資者博反彈入市，如果要博，建議博一啲基本因素較穩陣嘅股份，近期市況缺乏流動性，股價大跌令估值變得吸引，過去1年，央企背景嘅內房股表現較好，即使跌50%都跑贏其他內房板塊。若消息屬實，市場信心恢復，估值修正幅度上，唔代表跌得多就會彈得高。
佢又話，消息層面上冇太多特別啓示，復星國際仍然做緊沽售動作，反映成個資金鏈比較緊絀，如果有新資金流入市場係一個重大利好因素。短線方面，要轉身轉得好快，暫時存在好多變數，唔敢保證大市馬上見底，如果投資者想做短炒部署，要留意多啲相關消息。
