【now.com財經】噚日揀咗隻恒指熊(66913)出嚟，平均買入價為0.053元，Set好以五分鐘圖過10線為量度線。
睇返噚日個市，喺下晝2點45分出現咗唔知係咪傳說中嘅「休克式下跌」，指數一下子插落去14,800點樓下，一層牛證全數3,810張期指收回，之後雖然一下子抽返上去，CLS戰友出埋好倉捉個一截嘅小回氣。
直至到下半場3點20分，終於見恒指成粒燭完完全全企喺10線之上，(66913)都玩夠囉，又去到最後個一個鐘，都係時侯差不多起身。以此起計如常用10分鐘作為走貨時間的話，按3點20分至3點30分計，期內(66913)高低位做過0.077元/0.071元，平均走貨價為0.074元。呢一趟大食21格或39.62%...可摸耳收工直落等下個月先至再Trade呀？
噚晚都開始Feel到天氣愈嚟愈凍，老闆Whatsapp嚟話噚日個市對14,700至14,799點嘅牛證仁慈，又未必架，今日放生你再加埋噚日低見14,794點之後，抽返成140幾點先嚟收市，咁嘅走勢點會唔引人入牛？
天文台噚晚再度下調今日嘅溫度預測，降至得返6度左右，再睇埋牛熊證街貨圖，果然喺14,700至14,799點呢層儲返成1,250張期指街貨，而重貨區則見14,500至14,599點，都有成1,449張期指。隔晚美股又見造好，道指首次升逾38,000點，而標普同納指就創新高，連今朝睇電視都見到日股升200幾點，至於港股開市報15,038點，升77點，叫做爬返上15,000點樓上。
依家9點41分，我家老爺出咗門口返工，Whatsapp返嚟同我講話樓下又凍又落雨，大家都要小心保暖呀！特別係家中嘅老人家，突如其來凍幾日又再暖返，好容易病架！而指數暫時都似開著咗個暖爐咁，升125點，報15,086點。
的確，15,000點呢啲位都真係要打一陣攻防戰，不過指數喺10點未到喺一分鐘圖上見指數忽然爆上見「大陽燭」，連一分鐘圖都出呢支嘢，肯等下有問題；再過多10分鐘左右，終於見到條新聞「彭博：中國考慮推出一系列救股市措施，涉及動用2萬億元人民幣離岸資金」，考慮咋，都可以炒到個市將我成篇文差啲要重寫咁滯，小時圖上見指數兩大步就踩返上中軸以上水平，只係依家10點16分見上影線出現。
恒指牛(67116)，收回價14,748點，同現價有約443點距離，唔複雜諗話要追咩消息再上、反撲邊個位、好友戰勝15,000點，純綷用返小時圖，見保歷加底線打橫，增加指數同Slow STC(14.3)出觸底嘅走勢，又依家企住中倉以上，所以好倉出動睇下可唔可以食到上保歷加頂線，反正頭頂條50線喺15,720點，九丈遠我理得佢呀！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
