【Now財經台】內地家電連鎖零售商奇點國峰(01280)，以每股0.69元、折讓10%配股，集資逾3000萬元。今日(15日)午後突然有大量成交湧入奇點國峰，股價一度倍升至1.54元，係今日暫時升幅最大港股。《香港股票財技密碼》作者梁杰文提醒，股份短線有投機價值，但唔適合中長線持有。
集團新引入嘅投資者劉楊持股逾16%，一舉成為第2大股東，而大股東聖行國際嘅持股則由29%降至24.7%。Mike表示，聖行國際由2017年成為奇點嘅主要股東後，一直想借殼上市，除咗透過特別授權配股增持至近30%，喺2022年更嘗試「反收購」，由奇點印股票，換取注入旗下一間中小企業培訓服務資產。然而，可能因為咁做唔符合借殼上市規定，相關全面要約同收購已經喺2023年9月告終。
今次配股後，兩大股東嘅持股比例相近，因此，Mike估計，大股東可能意興闌珊，所以透過配股逐漸攤薄持股，繼而淡出奇點呢個融資平台。
