【Now財經台】截至早上11時止，1小時內《彭博》用戶關注度上升最多港股，依次為復星國際(00656)、萬科企業(02202)、中國海洋石油(00883)、世茂集團(00813)及瑞聲科技(02018)。至於第6至10位，依次為中國石油化工股份(00386)、雅居樂集團(03383)、港鐵公司(00066)、中國移動(00941)及建設銀行(00939)。
萬科近期頻頻上榜，現時股價喺9年低位徘徊。內房近排有返啲利好消息，據《彭博》數據顯示，萬科及雅居樂兩隻美元債分別錄得2個月及10個月最大升幅。萬科周二(9日)舉行電話會議，高層提及2024年債務情況及處理方法，似乎想穩住市場及投資者信心，中國奧園(03883)境外債務重組亦獲批，呢啲消息可唔可以幫手穩住內房股價？
大華繼顯執行董事梁偉源認為，近期內房債務問題多咗利好消息，包括債務重組有進展，令違約風險降溫，部分有央企背景嘅內房債券都有投資者買返，例如萬科美元債過去兩周反彈咗好多。
佢又話，內房問題已經持續好耐，若債務重組有進展，持有債券嘅投資者就會有返啲希望，但內房銷售都冇乜改善，未來要睇政策可唔可再推動資金入市，令股價回升。
