【Now財經台】美國即將公布消費物價指數(CPI)及生產物價指數(PPI)，美股喺數據出爐前夕有得升，可能同紐約聯儲銀行行長威廉斯(John Williams)偏鷹及對經濟前景樂觀看法嘅言論有關，加上評級機構惠譽轉軚，收返美國經濟會喺2024年陷入衰退嘅預測，美股今年開局都係上落市，後市可唔可以重拾2023年底嘅升勢?
東亞銀行財富管理部首席投資策略師李振豪指，今年係美國大選年，參考過去10屆大選年嘅數據，國內生產總值(GDP)升幅平均2.7%，而連任大選年平均3.7%，反映美國經濟今年較大機會 「軟著陸」，又指美國經濟會慢慢轉弱，唔會一下子急墜。
此外，數據亦反映過往嘅大選年，上半年經濟表現都比較差，但下半年會突然向好，所以預期美國經濟下半年會反彈，風險資產會續漸向好，而美股上半年會向下，但防守型及派息型板塊會造好，而美股下半年表現亦會好轉。
