【Now財經台】佐丹奴國際(00709)發盈喜，預期2023年全年多賺最多約29%至3.45億元，低過市場預期嘅3.62億元，同時預測下半年純利按年低最多21%，市場明顯唔收貨，佐丹奴股價今朝低開近14%，午後愈跌愈多，最多曾急瀉26%，見逾半年低位1.97元。
註冊財務策劃師協會會長黃敏碩認為，「假盈喜」會推冧佐丹奴股價，除咗因為盈利增長不似預期，收息一族或擔心公司銷售表現退步後會大削股息。佢續指，目前市況下，投資者傾向沽曬手上持貨，今日大量沽盤湧現，令股價最終跌穿250天線(又稱牛熊分界線)。
Michael又表示，佐丹奴被視為價值型股份同收息股，一般急跌後唔會有買盤好快撐返起股價，建議已沽貨嘅投資者喺公布全年派息後，先考慮重新吸納，最好儲夠基本面利好消息先「上車」。
