【Now財經台】摩根大通估計，中東局勢升溫會令全球運力下降9%，佔整體集裝箱運量約30%運力嘅蘇彝士運河最受影響，而另一條主要運河巴拿馬運河就受乾旱天氣影響，形成一個「完美風暴」，今次供應受阻可唔可以抵銷運力過剩嘅不利因素？如果想買航運股又應該點部署？
耀才證券研究部總監植耀輝認為，今次係突發事件，要短期內解決運力失衡問題唔容易，但相信3至6個月後有機會可以消化晒。
Stanley又指，運力涉及3大範圍，今次對集裝箱嘅運力影響最大，不過，乾散貨因季節性因素及美國農業出口量多，導致需求增加，所以成為今次贏家，反觀運油因產油國減產令需求唔大，如果想買海豐國際(01308)就要留意公司業務範圍集中喺東南亞及中亞地區，唔係特別受惠，若局勢持續，可以留意中遠海控(01919)或東方海外國際(00316)。
