【now.com財經】噚日揀咗隻恒指熊(61147)出嚟，喺10點25分見指數低於小時圖中軸落場，再於11點35分時見指數重上五分鐘圖嘅10線而走貨，快閃(61147)平均賺2.5格或4.5%。而如果計劃死守小時圖條中軸線的話，由於指數期後見再次下行兼再創日內新低，所以(61147)證價亦一度升到高位0.063元，而以收市價0.058元計，其實同快閃嗰一注嘅平均賺幅一樣，邊個位走就睇大家嘅功力啦。
今朝起身見到隔晚納指跌成1.63%，蘋果(AAPL.US)被券商巴克萊唱淡，指預期集團iPhone及Mac電腦今年銷情，所以下調評級至「減持」，一年目標價調低1美元，至160美元，推低股價噚晚都有3.5%跌幅。
唔好話隔離街個股唔關你事，除咗可以買入美股正股之外，依家市場上已經有以美股做Underlying嘅Call/Put比你去買，仲要唔駛開美股a/c都已經可以Trade得到，不過蘋果輪目前喺市場上的確係冷門嘢，所以要買佢都小心啲。
睇蘋果股價噚日盤後都仲有0.237%跌幅，唔多嘅，不過五分鐘圖上見股價上返50線以上企住，咁保歷加通道應該拓闊，而Slow STC(14.3)明顯見兩線上到超買位，好係有一種觸頂博回嘅情況；但重申保歷加通道口如果見拓闊的話，Slow STC(14.3)係有條件出超買再超買。
再睇日線圖，見噚晚股價裂口向下落到被50同150線卡住，Slow STC(14.3)亦差不多齊齊到超賣位，話佢仲有位向下呢句係真嘅，事關保歷加通道口都係見拓闊喎，只係呢個圖上見Slow STC(14.3)處於超賣位，換言之日線計佢係有出超賣再超賣；只係同時留意日線圖上下方都仲有條100線喺度。蘋果Put(10043)，行使價150美元，今年4月底到期唔算末日/短期輪，屬低引伸、高槓桿。記得記得，呢啲冷門嘢，注碼上留意一下。
望望鐘依家9點48分，恒指今朝低開163點，開市報16,624點之後已火速向下，預咗今日一開牛證第一層重貨區16,600至16,699點會全數被收回，嗰度都有過千張期指街貨，而再落見到16,500至16,599點同埋16,400至16,499點各有600幾張期指喺度，不過喺作戰室亦一早Mark好幾個位比戰友睇住沽：小時圖保歷加底線16,598點、日線圖20線16,548點，同埋小時圖100線16,530點。小時圖保歷加底線基本上都預咗佢無，但日線圖20線back test一下，可以接受，只不過指數由本來靠近熊證街貨嘅，依家向下一打落返去靠近牛證街貨層，20線都令人有啲擔心。
終於等到10點，見小時圖有新Update，雖然指數目標擺位係靠近牛證街貨層，但見小時圖Slow STC(14.3)有似出觸底，真係好想比隻好倉做下彿系注呢，恒指牛(64197)，收回價16,218點，同現價有約366點距離，槓桿有約37.69倍，反過來如見五分鐘圖破得到個「長方形」嘅話先至出手啦。
作者阿珊，以技術分析專心玩輪證，唔貪心，努力賺取我家肥貓罐罐。
