【now.com財經】新一年新開始，喺呢度先祝各位新年快樂！賺多啲贏多啲！踏入1月1日樣樣都加價，不過作戰室決定今年繼績維持住開壇嘅價，除非貓糧或Server加我價。
2024年恒指第一個交易日恒指紅盤高開升87點，報17135點。日線圖上見指數開市呢口價重上50線之餘，連上個星期比較忌諱嘅小時圖250線都企返上去，諗住新一年有新嘅開始，但可能正正就係紅盤高開咗，任務完成後，指數甫開市轉向下，3分鐘唔駛已經由升轉跌，5分鐘未到倒跌幅度已經逾100點，講緊呢度係差不多200點嘅高度。
本來見指數高開後兼踩住熊證第一層重貨區，作戰室Standby定好倉，但開市就睇住佢踩唔到線，成個市好似得騰訊(00700)單天保至尊，唯有變陣反手淡倉出動作第一注，仍然都係以爬格仔為主。
至於喺呢度，都係用返小時圖。如前文所指250線已經喺開市之後隨住指數低走已經失返，同步10線亦都無埋。換個保歷加通道則見通道口有收窄嘅情況，係有限制住指數再上嘅空間，只係無諗到今日第一粒小時圖嘅粒會出一支咁大嘅陰燭啫。
恒指熊(61147)，收回價17355點，同現價有相當於370點距離左右，桿槓有約42.45倍，同一收回價中槓桿最高，五分鐘圖見Slow STC(14.3)兩線都開始出超賣再超賣，再向下行嘅空間都係借小時圖中軸為目標，但指數愈落愈有，依家只係9點58分，恒指跌幅擴大至跌177點，報16870點，同小時圖中軸只係爭51點，出場位有啲尷尬，呢隻淡倉如果過得到小時圖中軸先至出手啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見FB專頁：https://bit.ly/3uixP4Y
