【Now財經台】大市向下，內需零售股受壓，大行唱淡內地消費股，大削多隻內地消費股目標價，大和就指預期內地明年消費降級。重災區嘅餐飲股又以火鍋股係「重災中嘅重災」，呷哺呷哺(00520)、九毛九(09922)股價分別見7年低位及破底。前者更加被降評級，因為下半年單價面臨嘅壓力比上半年更大，預料明年雖然擴張但維持弱勢表現。消費降級或不利火鍋股，加上呷哺呷哺嘅中高端品牌定位同市場開始對品牌厭倦，呢啲致命傷都令品牌前景淡過九毛九？
華盛證券財富管理部董事李偉傑認為，現時內地消費力降級會引伸出「物有所值」嘅消費模式，但呢個係比較被動嘅情況，因為受金融、地產、工業外流等因素影響，令市民嘅消費能力被削弱或者小心消費。
佢就指，呷哺呷哺屬於中高端定位，再下一檔就係海底撈(06862)，以內地嘅人均消費水平九毛九其實就唔算高檔，但都要視乎翻枱率同埋經營擴展模式會唔會繼續受市場喜好影響。喺消費降級嘅經營壓力下，呷哺呷哺嘅中期業績都反映咗壓力仍然未消退，表現都相對無咁理想。今年上半年，海底撈同九毛九已經分別接近同超越咗2019年嘅全年業績，收益上呷哺呷哺嘅盈利仍然係未能達標，所以大行降評級都合理。
不過，因為喺嚴寒嘅冬天，有可能會炒效應。不過資金就待變，如果有資金流入可能先有反彈機會。
