【now.com財經】上個星期五(12月8日)喺【輪證下半Part】揀咗隻恒指牛(55514)出嚟，安全嘅如常借五分鐘圖Slow STC(14.3)兩線回落返去超賣水平時先至出動，只當係做一趟Swing；而大前題係要小時圖守得住條20線。
睇返五分鐘圖，喺大約2點20分左右，Slow STC(14.3)兩線已經再次低於20，落返去超賣水平，呢一趟超賣仲超賣咗成個鐘，去到3點25分先至見Slow STC(14.3)過返20以上，按策略，(55514)喺呢個鐘裡面可以出場，只係要小心嘅係如果喺3點打後出場嘅，要有可能過Weekend嘅準備，所以注碼上可以留意一下。
按2點20分至3點20分五分鐘圖上見Slow STC(14.3)處於超賣位而(55514)符合落場條件計，期內(55514)高低位做過0.05元/0.044元，平均買入價為0.047元。
落場後還好見Slow STC(14.3)兩線都識得上返去，但可惜實在唔係好夠時間，上到臨完場前最後10分鐘都只係見到Slow STC(14.3)爬得返上去中軸位。由於係週末前嘅關係，如果(55514)呢注過夜嘅話係需要過Weekend，所以以番呢個專欄向來不過夜為前題的話，就應該搵位走人。
如常的用10分鐘作為走貨時間計，即3點50分至4點期間走(55514)的話，期內(55514)高低位做過0.046元/0.044元，平均走貨價為0.045元。的確見最後10分鐘Slow STC(14.3)兩線於中軸位出勢頭向下，不單止唔過夜走，勢色唔對更加先走為敬。呢一趟平均要輸兩格或4.26%。
依家9點19分，作戰室戰友們大家都已經準備等完U盤，見期貨向下衝緊200幾點落去，大家都準備今日隨時打16,000點攻防戰。而睇返今日牛熊證街貨圖，雖然牛熊兩邊最價層已經走到好近，不過以街貨量計，牛證嗰兩層過千張期指街貨層的確吸引。
完U後恒指開出口價再來年內新低，報16,149點，跌185點，呢口價已經同之前喺作戰室度畫借上年11月大上升裂口低部16,138點只係爭11點，都話裂口嘅嘢同仇一樣，都係時辰嘅問題。
「再下一個位係乜呀？」上個星期我老細都有問過我，可惜我不才，要用到月線圖借2008年低位10,676點，同恒指歷史高位33,484點嚟拉一個黃金比率出嚟先至搵到，見10,658點。依家9點42分，恒指暫時見低開後有出高走，今朝開市一度低見16,079點，同預定用黃金比率拉出嚟嘅量度線只係爭21點，呢個位上年年尾嘅時侯有穿過，不過因為疫情放寬至解禁，指數一下子抽高咗兩個月，避過一劫啫。
唔知今次呢一劫避唔避得過啦。恒指熊(62191)，收回價16,548點，同現價有約410點距離，槓桿有約35.9倍，仲有9分鐘10點，指數重新向下跌返有逾200點嘅跌幅，五分鐘圖見Slow STC(14,3)保持下行，暫時未見如之前咁一開市就衝落去咁，嗱！似仲有位架，上面用返對上一個低位16,157拉線，下面...睇街貨啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
