【Now財經台】友邦保險(01299)股價10連跌，累跌近15%，今日(8日)終於有反彈，點解畀投資者沽到咁？但另一隻保險股宏利金融(00945)就「同股唔同命」，股價愈升愈有，點解兩隻保險股走勢會咁分化？
註冊財務策劃師協會會長黃敏碩指，友邦除受穆迪降評級展望影響，本身亦係重磅成分股，底子較弱嘅成分股就容易受到拖累。基本因素方面，集團上季保單收入對比第2季明顯轉弱，由於內地經濟及消費力疲弱，第4季保單收入可能更差。
佢又話，宏利唔係成分股，加上集團都喺美加上市，股價互動性較強，而喺互動效應較大下，股價被刻意撳低嘅壓力唔大。
至於低撈友邦還是揀強勢嘅宏利？Michael就話，兩隻股份都可以部署，但依家仲未喺時候，若大市年底好轉，友邦股價有機會上返70元水平。
宏利方面，佢話有貨嘅投資者可繼續持有，始終走勢靚仔，依家14天相對強弱指數(RSI)已上到80，止賺位可以擺喺20天線，即149元水平，宏利有條件成為近日跌市避風港。
