【Now財經台】截至早上11時止，1小時內《彭博》用戶關注度上升最多港股，依次為金沙中國(01928)、太古A(00019)、太古地產(01972)、藥明生物(02269)及微創醫療(00853)。
金沙母企計劃斥資近20億元增持公司股份，以昨日(5日)收市價20.2元計，涉及約9660萬股，係咪反映20元水平真係已經見底？金沙股價一度升近6%，高見21.4元，係咪受增持消息帶動？
資深證券分析師彭偉新指，暫時好難評估金沙股價係咪見咗底，公司回購嘅目的係頂住股價，唔好繼續跌，消息一出，股價隨即企穩之餘，仲升得唔錯，但好難評估仲有幾多水位，依家市場目標價最牛睇34元，但合理價應介乎23.7元至28元，上望空間就介乎13%至30%。
Castor又話，要到新年先有賭收數據，新年前如果純粹炒賣，就好難扭轉近期弱勢，今次母企計劃增持，即使市場睇淡，但估計都唔會沽得太多，股價暫時喺50天線有較大阻力，如果想再進一步向上突破，一定要更多利好因素。
