【now.com財經】噚日揀咗隻恒指熊(61654)出嚟，先喺上半場到下晝返嚟開市無幾耐食一Round，平均執4.5格或7.83%；喺【輪證下半Part】講明睇下搵唔搵到多一個位可以再出多次淡倉，線都拉定好，當時借返上半場11點幾時做嘅低位，大約16,33X點左右。
去到下半場大約2點30分左右，見到指數向下再落，兼且稍稍低過16,33X點呢個位所拉出嚟嘅量度線，同步借埋保歷加通道口拓闊，(61654)的確可以再次出場。如常的用10分鐘作為買入時間，即2點30分至2點40分期間，(61654)高低位做過0.063元/0.058元，平均買入價為0.0605元。
第二次落場後指數再創新低，去到3點打後見指數落到16,23X點就開始企定，同步亦見保歷加通道口由拓闊慢慢變返做平衡，於3點25分見指數重上10線& Slow STC(14.3)亦出觸底，(61654)又係時侯執格仔。以3點25分起計如常用10分鐘作為走貨時間的話，期內(61654)高低位做過0.071元/0.067元，平均沽貨價為0.069元。下半場同一隻熊再執多8.5格或14.05%，即全日平均賺幅有21.88%。
今朝恒指開市如同過往幾日般，開市口價變化唔大，只係低開15點，開報16,311點，如常的喺作戰室由五分鐘圖睇到日線圖之後，暫時都未搵到指數嘅方向，但以現價同牛熊證街貨比較的話，的確現水平仍然靠近下方牛證街貨層。
都話，下方牛證咁多，再加上同熊證距離咁遠，今日新上市熊最貼價都只係落到16,831點，同現價有成500幾點距離，所以先令指數一路向下，或者熊證唔夠貼呢個都係致命傷之一。不過，個人嚟講比較介懷個小時圖，事關噚日小時圖最後兩粒燭出咗爭一點「平底」，仲要係用年內低位做出嚟嘅平底(16,228點/16,229點)，依家開咗市15分鐘，第一下指數向下直插見跌逾80點引咗出熊再沽，但第二支「大陽燭」打埋嚟，唯有即時棄淡轉好；雖然之後指數上行步履同飲醉酒差唔多，但係都係唔好再反來反去，咁嘅情況之下係咁反好容易中左一巴右一巴。
如同之前提過，有時侯單邊市出單邊貨真係有可能出到個人麻目晒，你數下你由上個月開始到依家，出牛熊倉嘅比例係幾多？雖然依家9點48分，恒指只係升49點，但仍然要提醒自己狼來了總會出現。
本應咁嘅情況係應該揀隻牛證出嚟，但其實嚟到依家9點54分，指數上到同小時圖10線差不多水平，大家等緊嘅係呢個位倒底指數過唔過，唔過的話就會走好倉、換淡倉，重新博指數再次下行；同時亦預計五分鐘圖Slow STC(14,3)兩線上到超買位之後，保歷加通道一旦由拓闊變返做橫行的話，咁指數同Slow STC(14,3)都會出現觸頂向下，所以先比隻恒指熊(61802)，收回價16,831點，同現價有逾570點，市場上最貼價牛及最高槓桿之中，成交最活躍。
另外，恒指牛(54934)，收回價16,008點，同現價有逾350點距離，槓桿約有34.08倍只限Day Trade，有咩用？五分鐘圖佢企得到10線再比力去咪有用囉，9點半至10點小時圖唔過10線啫，難保佢喺10點至11點或之後上喎。
都係嗰句啦：個人嚟講比較介懷個小時圖。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
