【Now財經台】網易(09999)股價又跌逾5%,跌至1個月低位,騰訊控股(00700)今個月會推出多人派對遊戲《元夢之星DreamStar》,硬撼網易今年爆冷大收旺場嘅《蛋仔派對》,《元夢之星DreamStar》對網易嘅威脅大唔大?
英皇資本財富管理方案研究總監陳錦興認為,《元夢之星DreamStar》會對網易構成威脅,《蛋仔派對》去年中一推出就爆紅,相信騰訊都感到意外,多人休閒遊戲竟然大受歡迎,所以就快速打造新遊戲《元夢之星DreamStar》,但相信正式推出時未必會互相蠶食,反而會吸引更多新玩家入場。
佢又話,《蛋仔派對》爆紅帶動網易收入,投資者會擔心畀《元夢之星DreamStar》比下去,繼而影響股價。
網易股價已補返10月25日個上升裂口,後市會唔會繼續跌,Stanley就指,雖然網易沽壓持續,但150元水平仍有好大承接力,反映市場對呢隻股份仍有好大信心,所以不妨喺呢個位置博反彈。