【Now財經台】藥明生物(02269)今日(4日)早上開業務會議，股價急瀉近24%後，喺10點49分突然中途停牌，會議上有唔少令人驚嚇嘅利淡消息，包括因為生物科技融資令新增項目按年減少40個，導致開發收入較預期低最多20%，而3款重磅藥延期影響生產收入，導致今年收入較預期低最多18%，有分析估計，集團今年整體收入僅增長10%，遠低於指引嘅30%，落差會唔會太大？
博威環球證券金融首席分析師聶振邦認為，落差其實都有啲大，藥明生物冇公布第3季業績，但預告全年業績或同市場預期有較大差距，投資者嘅失望就反映喺今日股價上。佢又話，其實阿里巴巴(09988)及美團(03690)業績都唔錯，但市場更聚焦公司後續發展，由於對未來發展嘅解讀比較負面，導致股價大跌，藥明生物今次都有同樣情況。
股價方面，聶Sir指，藥明生物之前落到43元水平，反映增長已經跟唔上市盈率(PE)，依家PE高達30倍以上，但收入僅增長約15%，估值偏高，佢又估計，復牌後沽壓會較大，短期不論盈利及股價表現不宜太樂觀，暫時可以睇30元有冇支持，又認為26至27元先係合理水平。
