【Now財經台】美國聯儲局主席鮑威爾上周五(1日)就貨幣政策發表講話，指依家討論減息係太早，又話有需要時會再加息，但市場繼續憧憬美息見頂，局方明年會開始減息，刺激金價今早(4日)破頂，衝破每盎司2100美元，之後就回落，金價後市可以再衝高幾多？
商品期貨專家兼MAX Online亞太區業務總監杜浩霆指，金價整體趨勢以向上為主，依家市場主要睇聯儲局幾時減息，但金價依家呢個上升趨勢係早喺幾個星期前，即美國出消費物價指數(CPI)時開始，由於預期美國最快明年3月先減息，所以短線仍以向上為主，今朝破頂後，短線關鍵阻力喺2080美元水平，要睇下今個星期可唔可以升穿，如果突破到，有機會上返今朝高位，即2100美元樓上。
