【Now財經台】港股市況一直冇起色，12月開局即殺落今年低位，今日(4日)一度又挫逾200點，繼續刷新今年低位。不過，高息股11月嘅表現其實已有返啲起色，睇返今日上半場，唔少藍籌高息股都逆市升，其中，長江基建集團(01038)升2%，東方海外國際(00316)、領展房產基金(00823)、九龍倉置業(01997)及中信股份(00267)等升約1%，散戶及食息一族明年應該點部署？
安泓投資總監兼香港大學房地產及建設系客席副教授楊書健表示，雖然港股今年表現麻麻，但有唔少投資者「戰績」唔錯，以電能實業(00006)為例，舊年收爐股價喺42.5元水平，現價喺40元水平，雖然跌約1%，但如果擺返今年派嘅息入去，成個盤嘅回報都冇蝕，如果高息股炒返上去，基數更加會變大咗。
Victor又話，電能係一隻好穩健嘅股票，加上股數大咗，即使要捱多一兩年高息環境，明年派股息會多6%至7%，以現金流嚟計，散戶可以考慮喺現階段建立倉位。
