【Now財經台】華章科技(01673)建議2供1,按公開發售基準進行,供股價0.2元,較上周五(1日)收市價折讓逾49%,發行股數佔現有股本50%,集資淨額約1億元,大部分都用嚟還銀行貸款。值得留意係,用公開發售形式係比較罕見,到底背後有咩盤算?
《香港股票財技密碼》作者梁杰文指,供股同公開發售唔同,公開發售冇供股權都可以買賣,若供股權可自由買賣,就可以出售套現或繼續吸納,對投資者嚟講有少少唔公平。如果用公開發售基準進行集資,須召開股東大會尋求獨立股東批準,所以一般都會選擇供股。
Mike又話,由於公開發售須要召開股東會,大股東通常都會做埋包銷商或趁機增持股權,華章有1名主要股東全資擁有包銷商,持股15.16%,市場都關注呢名股東係咪想低價增持?
佢認為,呢名股東唔係大股東,又冇絕對控股地位,股權相對分散,可能佢原本都打算借供股成為包銷商趁機增持,但為咗確保增持計劃順利,就順水推舟進行公開發售。