【Now財經台】中國恒大(03333)今日(4日)喺高等法院進行清盤聆訊，據《華爾街日報》引述消息指，境外最大債權人正跟恒大進行最後談判，避免集團海外業務被清算。英國《金融時報》亦引述消息指，國際債權人近日一直同恒大磋商不同重組方案，希望可以喺最後一刻達成協議。一旦恒大被清盤，對市況會有咩影響？
高富金融集團投資總監梁偉民認為，即使恒大遭清盤，亦未必有太大影響，因為市場對恒大違約早有心理準備，亦知道救得返嘅機會較低，因為主要涉及集團海外資產，內地資產唔受影響，佢又相信，對其他內房以至整體經濟嘅影響只會愈來愈細。
Wyman又指，基於制度原因，喺內地要房企清盤其實唔容易，中央亦未必會容許，因此，出現違約嘅內房都可以勉強喺內地繼續運作，不過，可以撐幾耐、交到幾多樓等，都要睇返政府政策，佢又估計，市傳扶持房企嘅「白名單」就算落實都唔會有恒大份。
