【Now財經台】石藥集團(01093)今日(30日)中午出咗首3季業績，收入升1.6%，純利就升不足1%，單計第3季，純利亦只係輕微增長，集團又公布，自主研發嘅高膽固醇注射液獲臨床試驗批准，午後股價一度衝高，跑贏大市，到底係受業績帶動，還是注射液有好消息？
耀才證券研究部總監植耀輝認為，藥股經常有新藥相關消息，呢啲對股價幫助唔大，尤其依家市況麻麻。至於石藥業績只係四平八穩，冇乜驚喜。
股價方面，睇返整體藥股表現，近日係跑贏大市，所以石藥股價今個月都做返好啲，不過，由於藥物始終欠缺大突破，所以要提升估值就要睇業績，今日派發呢份成績表只係平穩，好難成為估值催化劑，佢估計，石藥股價會喺現水平拉鋸，同埋都要睇返市場氣氛，如果整體藥股造好，石藥都可能會跟炒一轉。
