【Now財經台】截至早上11時止，1小時內《彭博》全球用戶關注度上升最多首5隻港股，依次為阿里巴巴(09988)、比亞迪股份(01211)、滙豐控股(00005)、碧桂園(02007)、中國人壽(02628)。
業績期後「ATM」股價命運不同，榜首嘅阿里股價又見逾1年低位，早前更同美團(03690)一齊破底，得返騰訊控股(00700)仲喺「紅底股」，暫時係今日表現最佳藍籌，一度升近3%後，半日收報323.2元，仍然升近2%。
椽盛資本投資總監曾永堅表示，騰訊最新業績表現出色，尤其核心嘅遊戲業務收入維持雙位數強勁增長，論增長前景集團比另外兩隻更好，自然可以支持到更高嘅市盈率(PE)。
Jaseper續指，雖然南非大股東Naspers持續減持，但騰訊嘅預期PE有約20倍，對長線投資者具吸引力，例如知名投資者段永平早前就話加倉咗騰訊，相信可以慢慢消化大股東減持嘅壓力，建議等股價回落到約306元，即接近50天線，再分段吸納作長線持有。
