【Now財經台】疫情後全球都出現消費降級，但有部分低端內需股靠拓展海外市場交到靚業績，美股代表有拼多多，港股亦有名創優品(09896)，集團上季有近35%收入來自海外，收入增長更跑贏內地市場。
元宇證券投資總監林嘉麒指，相比內地消費力以斷崖式下跌，外圍暫時維持到跟過往相若嘅消費力，所以名創優品呢類低端消費股能靠對外輸出平價中國貨，補足返消費疲弱嘅內地市場。佢又提及，名創優品嘅盲盒業務面向中低端市場，喺當前經濟環境下反而可以殺出一條血路。
名創優品股價今日逆市升近3%，並以接近全日高位收市，報49.75元，KK認為，可以等股價跌到40元邊先吸納。至於內需消費板塊，佢話表現兩極，高端消費股未見底，低端嘅又升過龍，建議投資者等埋第4季業績，如果到時有業績差、估值又低於10倍嘅低端消費股，先考慮小注吸納。
