【Now財經台】近年內房民企出現違約風險，以往大量舉債去興建項目，達到貨如輪轉嘅經營模式似乎已經走到盡頭。廣東省地產商會副會長尹德輝表示，內房行業現時面臨結構性問題，並指留意到內地發展商已從「建築快速周期」開始發展到「資產管理」階段。
尹德輝續指，經過逾30年嘅發展，唔少內房嘅業務已經唔止買地起樓，亦擁有唔少商業項目收租，例如酒店、商場，有可能會發展房地產投資信託(REITs)。如果想吼內房股，未來10年一定要識睇公司嘅資產管理業務質素、項目主要所在地區、租金回報及升幅等租務數據。
尹德輝又指，大灣區仲有唔少投資機會，可以研究一下政府點規劃基建，就知道會旺邊啲城市，佢認為中山嘅發展可以睇高一線，除咗因為中山消費物價比深圳再平一截，預期明年通車嘅「深中通道」，將大幅縮短來往深圳、中山嘅車程，由原來需時2小時縮短至僅約30分鐘，有望吸引更多人到中山消費。
佢續稱，當地樓價已偷步升咗逾1年，建議有興趣嘅投資者趁當地經濟開始起飛，現時開舖做生意或買樓投資嘅回報仍有好大上升空間。
