【Now財經台】央行激進加息周期快將落幕，美國10年期債息由10月高位，即5厘平回落至現時約4.4厘。綜合交易員分析，市場預期，聯邦基金利率於明年底將降至約4.5厘，較現時5.25至5.5厘大跌近100點子，更估計聯儲局最快明年5月就開始減息。
不過，《彭博》早前訪問咗73名經濟師，大部分認為聯儲局明年未必會太早減息，因為通脹仍相對高，預期美息僅逐步回落，當局只能漸進地放寬貨幣政策。受訪經濟師估計，最快明年中先有望減息，甚或維持高息至2025年底，睇法同交易員相當分歧。
東亞銀行首席投資策略師李振豪直指，市場過分炒作減息預期，依家吹奏明年初減息嘅分析，牽強兼欠理據。佢補充指，美國財政部拍賣10年期國債的面價約4.53厘，而市場吹緊出年息口減至4.4厘，低過公價並唔合理，並指計埋風險溢價(risk premium)，減至4.6至4.7厘先係合理水平。
李振豪又認為，美元走勢散到唔正常，而10年期債息短期內大幅上落，好多時候係期貨、期權市場嘅波動引致，料12月14日聯儲局議息會議後，主席鮑威爾若再「放鷹」，屆時美息又會反彈，背後推動呢輪炒作嘅力量隨時消失，提醒散戶唔好過於相信分析，以免一頭熱最終炒燶損手。
