【Now財經台】中教控股(00839)股價今日(28日)喺大成交下急瀉，一度插逾20%，集團全年少賺逾25%，主要受累主營成本增逾22%，其他虧損增至5.4億人仔，融資成本亦增至4.69億人仔，不過，經調整EBITDA增長6%，中教呢份業績邊部分最令市場失望？
英皇資本財富管理方案研究總監陳錦興認為，中教股價反應咁大，反映市場對業績倒退感到意外，撇除非現金項目減值，經調整盈利增長差過收入增長，反映毛利率及經營溢利率都有壓力。
派息相信係一大失望位，派息比率由去年45%降至42%，喺盈利前景陰霾下，未來派息係咪都好難有期望？中教股價今日一棍插穿近期支持位6元，股價係咪會繼續尋底？陳錦興指，睇返行業大環境，相信中教都寧願保留多啲現金，估計未來派息冇突破之餘，亦會比較差。至於股價，佢認為好大機會繼續下試低位，主要係今次都冇預期有減值項目，市場一定會擔心係咪陸續有來，肯定不利股價表現。
