【Now財經台】港股弱勢，而喺人工智能(AI)大時代下，港股缺乏長遠增長故事，黃國英資產管理旗下基金重倉邊啲股份？邊啲股份揀得落手？
黃國英資產管理董事黃國英認為，中國移動(00941)、安踏體育(02020)、富途及聯想集團(00991)等都係比較好啲嘅股份，但同外面比動力都係差少少，安踏最近受李寧(02331)、特步國際(01368)拖累，而富途市場暫時都唔願意畀一個較高估值，中移動及中國海洋石油(00883)比較穩陣，但擔心要「為國捐軀」，所以有一定風險，較難好似之前咁勁，佢坦言呢啲都係「揀無可揀」嘅選擇。如果真係要揀，可以考慮百度集團(09888)，相對係香港有少少支持力嘅股票。
至於AI板塊係咪揀股首選，Alex認為，香港投資者會傾向揀外向型企業，因為覺得同中國相關性較低，例如創科實業(00669)、聯想、舜宇光學(02382)最近好返啲，AI方面，百度同出面比都係蝕章啲，雖然出完業績後好返啲，但睇長遠啲都係大幅跑輸外面。
黃國英又話，揀AI股香港唔係一個好選擇，因為市場將焦點由AI基建轉移至AI應用，英偉達(Nvidia)出完業績已經撞咗牆，主要係因為中國問題。佢續指，若中國喺AI應用層面輸蝕，將來稱霸嘅都會係美國公司，所以會見到美國軟件公司，例如由微軟(Microsoft)係明顯領導住大市，所以明年嘅大趨勢短期應該係由AI基建轉移至AI應用。
