【Now財經台】截至早上11時止，1小時內《彭博》用戶關注度上升最多港股，依次為碧桂園(02007)、比亞迪股份(01211)、阿里巴巴(09988)、新世界發展(00017)及百度集團(09888)。新聞熱度榜方面，依次為電訊盈科(00008)、東方甄選(01797)、周大福(01929)、中信銀行(00998)及小米集團(01810)。
東方甄選出咗通告，將會向母公司新東方(09901)發行逾5100萬股認購股份，認購價31.75元，同噚日收市價一樣，東方甄選所得淨額約16億元，集團出售教育業務，專注做自營產品及直播業務，係咪可以憧憬直播業務會愈做愈大？
大華繼顯執行董事梁偉源指，東方甄選未來應該會有更多針對網紅、直播銷售嘅策略，不過，睇返東方甄選股價，年初一度衝上75元，輾轉落到依家31元水平，加上直播業務競爭大，反映投資者對呢項業務嘅發展仍有保留。
佢又話，要留意東方甄選點用今次配股集到嘅資金，同埋內地明年第1季經濟情況，先可以判斷股價會點走。
