【now.com財經】噚日揀定隻恒指熊(60257)出嚟，本為以小時圖10線會擋住Slow STC(14,3)出觸底，事關指數落去到50線之後，足足用咗四粒小時圖嘅燭嘅時間，先至見到指數上破10線，同步Slow STC(14,3)成功出觸底。呢下觸底都真係等咗好耐，諗住佢唔出所以揀定隻熊，結果同細路一樣，愈係叫佢唔好，佢偏係要做，一下子井噴上去見17,900點樓上收市。還好作戰室喺下半場見2點5分出「大陽燭」後即追好倉，先至無Miss到呢一個升得咁嘩嘩聲嘅下半場。
「仲爭100點左右又到18,000點啦喎，會唔會又打攻防戰架？」嘿，今日連18,000點都未掂到，恒指開市向下落139點，開報17,771點，喺作戰室以五分鐘圖至小時圖度好晒位之後，淡倉第一注比出先睇17700點呢個位。望望鐘依家9點41分，恒指兩度跌穿17,700點水平，作戰室爬格仔/食點數嘅戰友，今日Happy Friday咗架啦！
雖然今日指數回返落去，不過喺牛熊證街貨圖上仍然未見有街貨層被收回，收返嘅最多都係今日新上新嘅17,700點至17,799點嘅牛證。不過呢堆本身今日上市嘅，又何來有街貨呢？然而，牛證街貨今日返嚟見的確比熊證嘅多，可能見噚日指數一下子飆到咁，博今日比多百鬆啲點去多次18,000點先至再回啦，如是者就有咁多肥牛喺度，首三層街貨唔係900就過千，大佬，今日Black Friday呀，係咪咁半賣半送先？
再睇返小時圖，今日指數向下小時圖亦擺返低於20線，Slow STC(14,3)兩線亦於中軸水平有似橫行狀態，不過下方條50線仍然接住指數。又咁講，就算10點至11點期間出嘅第二粒小時圖嘅燭，借下方100線都只係見17,600點，逐層逐層向下打都需要啲力。再睇依家9點54分，恒指跌幅再見擴大至跌228點，報17,682點，見五分鐘圖Slow STC(14,3)兩線都開始出超賣再超賣，隨時保歷加通道頂線準備向下，即增加指數同Slow STC(14,3)出現觸底機會，如是者出淡倉再追落的話，比較安全嘅係等上述情況出現之後，睇下有無平均線出嚟做阻力，有嘅，比注淡倉出去當係進取注；再安全嘅，如常用返Slow STC(14,3)做Swing，即等超買位先至再落場。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
