【Now財經台】多家大行唱好Tesla概念股耐世特(01316)，並引述集團管理層透露，旗下產品組合喺上季終於包攬曬「全球領先、美國最大電動車廠」嘅零部件，又話單計上季定單金額已達15億美元，有信心今年累計定單金額逾60億美元。
元宇證券投資總監林嘉麒相信，耐世特全年定單達標冇難度，反而更關注近年每況愈下嘅毛利率有冇改善，睇返中期業績，毛利率僅9%。此外，佢又提及早前美國汽車工人罷工嘅餘波，除咗間接影響耐世特該季定單，大型車廠大幅加薪或令耐世特要減價留客，繼而影響收入。
耐世特股價持續強勢，4日累升近40%，今日更一度升上5.2元嘅逾兩個月高位，收市升近10%，報5.1元。KK指，股價短短4日已突破所有移動平均線，加上連續兩個交易日錄得大成交，預測市盈率(PE)高達15倍，睇返技術走勢，有短線見頂跡象。
佢又話，耐世特股價喺5.2元有頗大阻力，建議等股價見頂回落，甚至跌穿位250天線，即4.75元水平再考慮吸納，並指股價落到牛熊線一般會有支持，屆時值博空間更大。
