【Now財經台】美國10年期債息自高位回落，依家喺4.5厘上落，債息跌債價就升咗上去，但係咪咁快就要炒減息？雖然美國通脹持續降溫，但聯儲局主席鮑威爾上次議息時話，唔排除再加息。
成家網上投資課程導師徐冠鴻認為，依家炒減息唔算太早，市場亦已經炒緊，以息口敏感嘅領展房產基金(00823)為例，表現肯定係跑贏大市，因為股價已自低位回升20%，領展係以收租為主嘅房託，比其他本地地產股對息口更敏感，再加上美國國債，以至亞馬遜(Amazon)、迪士尼(Disney)都有出債券，或者香港嘅滙豐控股(00005)都有出永續債券(Perpetual Bond)，罕有見到喺11月債價係全部上升，但孳息率維持喺4.5厘以下，加上房託今次有良好反應，債市唔同板塊都升，係踏入今年罕見嘅情況，反映資金因息口見頂而湧入市場。
