【now.com財經】噚日揀咗隻恒指熊(59106)出嚟，上半場速食咗12.94%之後，下半場返嚟指數同睡公主一樣瞓到直一直。及至完場前，喺五分鐘圖上見Slow STC(14,3)兩線落到個位數嘅嚴重超賣，兼有少少作勢觸底樣，打靶唔肉痛好倉一注比出博過夜，真係好少喺作戰室出過夜注。
今朝起身見隔晚美股升成400幾點，原因係咩都唔係好想知，只係見ADR都有300幾點進賬就心滿意足。今朝恒指完U後升400幾點，開市上到17,800點樓上，先將熊證首三層街貨全數打靶，呢度已經有相當於736張期指，對比平時一食食成過千張期指街貨嘅，可能阿市仲未夠飽；我理得佢，總之隻過夜打靶唔肉赤好倉安全抵壘兼正數就得啦。
當然都有戰友一齊喺今朝先食過夜牛，但亦如同佢所講一樣，指數今朝作裂口高開之後就如同死人一樣，心跳打橫行。到依家10點17分止，指數仍然於17,800點附近徘徊，現報17,801點，升404點。
暫時指數日內高低位做過17,766點至17,871點，波幅只得105點，同今朝喺作戰室用小時圖畫好晒所有線作為量度線甚為相近，只可惜指數實在行得比間尺還要直，等到依家10點27分都摺唔到位出倉。
以街貨圖計，唔駛睇指數依家近熊，向上再殺嘅機會甚高；不過今日日線圖見指數裂口高開上去之後，又再次靠近返年初至今日線圖上畫出嚟嘅大型「下降通道」頂線，未到嘅，呢條頂線隨住每日低啲、每日再低啲，依家個位置同18,000點相近。
如是者，由依家17,800點水平至18000點嘅大型「下降通道」頂線仲有約200點水位，冒險少少食埋佢先再等睇18,000點攻防戰(做到好似Marvel，係咁開續集)，只係依家五分鐘圖上見Slow STC(14.3)keep住喺度高位度未見方向，進取少少借五分鐘圖10線企穩而出好倉的話，恒指牛(59348)，收回價17,408點，同現價有逾400點 距離，槓桿約29.69倍都夠做Day Trade，就睇下佢幾時開18,000點攻防戰續集。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
