【now.com財經】噚日揀咗隻恒指熊(58904)，喺10點10分起計如常用10分鐘作為買貨時間的話，以平均買入價為0.043元計，再喺11點至11點25分呢段時間，借Slow STC(14,3)兩線落到超賣至嚴重超賣走隻(58904)當Swing Trade一趟收工的話，平均沽貨價為0.0515元，呢一趟一個鐘頭左右速食8.5格或19.77%。
本以為噚日下半場開市後指數唔過保歷加中軸可以嚟多轉淡倉，而(58904)亦都可以重用多一次，不過，開咗市15分鐘左右指數反方向走，作戰室全數有貨嘅都即時棄淡轉好，以為自己好貪心，Set以小時圖20/100線做目標夠狼，但狼前面仲有隻獅子，阿市用咗全日完場前最後15分鐘，先嚟一支「大陽燭」向上抽高，再嚟多兩細見上影線嘅陽燭再爬高多少少，最終17,450點有到步過，只係收市後見17426點，日線圖先攞返條20線先。
噚日開始都Feel到轉涼，入夜後我都頂唔順要搵返張墊鋪下，我家肥貓二話不說咁暱咗入嚟。坦白講自領養佢兩年幾以來佢都未試過坐喺我對腳之上，雖然係隔住張被，不過都份外覺得溫暖。
今朝恒指繼續回暖，開市再升多60幾點見17,495點，咁嘅樣都似係衝17,500點但喺五分鐘圖上見噚日最後嗰粒燭出嚟個樣都有啲似「射擊之星」，所以今朝搶好倉都真係以快打快形式去處理。嚟到依家10點14分，指數一度倒跌，梗係啦，強如Slow STC(14,3)都有到頂嘅一日，更何況係條恒指？作戰室反手淡倉出動中兼目標向下望住五分鐘圖嘅保歷加中軸。
小時圖上見指數依家已經低走於50/150線以下水平，保歷加通道口的確收窄中，唯暫時收窄幅度都未見好大，Slow STC(14,3)兩線亦都未見向下行，換言之佛系淡倉未儲夠條件可以出動，不過如果指數仍然低走於小時圖150線，同步五分鐘圖保持向下的話，恒揩熊(59106)，收回價17,850點，同現價有約360點距離，所以槓桿有約46.01倍，真係夠做Day Trade。五分鐘圖10線壓得住指數都有得出貨架。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
