【Now財經台】德昌電機控股(00179)昨日(8日)收市後出咗業績，半年多賺1.15倍，毛利率升至22.2%，算唔算係業績入面最大驚喜？德昌股價今日一度炒高逾13%，逼近12元關口。
亨達財富管理董事總經理姚浩然指，如果睇營業額增長唔算標青，運輸成本喺疫後開始下降，再加上規模效應，令成本減省幅度進一步加大，從而推高毛利率，盈利增長亦非常理想。
雖然毛利率有驚喜，但睇返德昌主業，歐洲係2A汽車產品組別主要增長動力，但係歐洲經濟數據差，會唔會拖累下半年增長放緩？
Patrick認為，要明年先明顯睇到呢個轉變，美國人嘅消費意欲喺9月開始降低，市場認為美國經濟唔係咁好，歐洲亦開始加唔到息，美國經濟率先轉弱，繼而殃及其他國家，會令到一啲產品如汽車需求減少。
