【Now財經台】港股有望企穩50天線之際，又有細價股出嚟向股東伸手，內地營銷服務提供商潤歌互動(02422)宣布，建議「2供1」，供股價每股0.2元，較上周五(3日)收市價折讓逾49%，集資最多1億元，潤歌股價今日早曾急瀉逾17%，低見0.325元，其後回穩，午後更一度升逾7%。
潤歌啱啱上市滿1年，本身有虛擬商品採購及支付業務，今次而家計劃集資最多1億港元，其中65%用嚟收購內地電商解決方案業務，目標公司主要做中介，先收集電商平台上網店嘅團購定單，然後直接向品牌採購，再交貨畀訂戶賺差價。
《香港股票財技密碼》作者梁杰文指，今次係公司半年以來第2宗收購，估計兩單收購合共涉資逾1億元，截至6月底止，集團帳面現金由去年底1.86億人仔縮至1.48億人仔。
Mike續指，潤歌上市後首份中期業績已大走樣，純利大跌近60%，上一單收購未見成效，又向股東伸手未免太進取，投資者供股前宜三思。
